(قصيدة ديل حصان)
تأليف خالد الجمال
كمل كلامك و ابعته
قبل الطريق ما يودعك
وافرد ملامح فرحتك
د الفرح عمره ما يوجعك
ع الغصون أصله اتبني
والشجرة دفنت حزنها
وف طرحها جيل جديد
هل نوره م السما
واترمي
عليه طوفان
م اللي نايم من زمان
واللي ساكت من زمان
واللي كان ملوش مكان
كله راكب ع الحصان
الحصان اللي اشتكي
من زمان الهمبكا
والفهلوة
واللولوة
قادرة بتلوي في الزمن
لما المحن تصرخ بأعلا حسها
مين حسها . ؟
مين قالها . ؟
إن الحصان ساب اللجام من زمان
واتعمي قبل الأوان
يا امة قومي وأنهضي
قبل الكلام ما يسرقك
ويغرقك
والنيل يفضي ميته
بعد الحروف ما تلمسه
وتلوثه
تلاتين سنة دمه سايل ع الملأ
شافه دمع اللي اتسرق
اللي ضحي واللي اتشنق
واللي نام جوة السجون
من غير قلق
أيه ذنبنا . ؟
العمر ضايع مننا
مدقش لون طعم الهنا
أيه ذنبنا. ؟
الذنب إنك في التابوت
راضع معاه قهر وسكوت
وجاي تقول للحي موت
قوم
خليني مرة افرحك
قبل الزمان ما يروحك
نضف حصانك جدده
وأمسك لجامك ثبته
واعرف كلامك حدده
قبل الطريق ما يودعك
وتبقي مسخة في الزمن
لما تسيب
ديل الحصان يسبقك 
من ديوان ( الدايرة دارت ) لخالد الجمال الذي طبع عام ٢٠١٢ م تبع الهيئة العامة للثقافة إقليم القناة وسينا قصيدة ( ديل حصان )
