اشعار مسرحية قصة قناة لخالد الجمال
في ديوان خارج الزمن لخالد الجمال
مصر أمة جيل وجيل
تبقي حمي ع العميل
شعب منه جيش أصيل
نوره دلتا ونهر نيل
قبل التاريخ ما يكون تاريخ
أسرة أولي وأسرة تانية
إدريس وعلمنا الهجاء
علمه كان لينا دواء
أسرة تالتة لأسرة ستة
أهرمات فوق في السماء
زوسر سنفرو خوفو خفرع
فن وشموخ فوق في الفضاء
أسرة سبعة لأسرة عشرة
الخلاف بينهم عنيد
وانحني وسط الوليد
شعب سلم للعبيد
موت يا قمح في الأراضي
الخضوع ساكت وراضي
والعقول مفهاش عقول
لما تسيب العقل فاضي
بعد الخصام جه الرخاء
لكل داء كان الدواء
وارتحل عنا البلاء
وعلينا فوق فوق في السماء
امنمحات قاس وحسب
كل الكلام عليك يا نيل
أنت الحبيب واحنا النسب
وأنت العروق وأنت العصب
افتح كتابك يا تاريخ
عرفهم اللي كان هنا
سنوسرت قائد يا حكيم
يا موصل البحر الكريم
سيزوستريس رايحة السويس
تحلم بمكنة الدريس
سيزوستريس عاشقة الهاويس
عروسة النيل العظيم
عمرو عدا باليقين
بقناة أمير المؤمنين
والنيل يميل ضحكته
يحضنها موجه بالحنين
عرابي والتل الكبير
دم الشهيد زي العبير
عطر دروبك يا بلد
مسألشي ايه هو المصير
والحياة بتعود ضلام
أماني ضايعة في الكلام
غمة هلت ع البلد
إنجليز مسكوا الزمام
دليسبس قام ولعها نار
قال مفيش غيرها خيار
والباشا قاعد في انتظار
لحظة خروجك يا قرار
سعيد وزين بور سعيد
الفرما في توبها الجديد
السويس مفهاش عبيد
غضبها سيح الحديد
بعد ما لاح فينا البريق
وإسماعيل ألغي الرقيق
والمراكب في الطريق
قناتنا ما تعرف شريك
يمشي زمان يهزنا
يشد فينا يهدنا
مصطفي كامل كان ولد
صحي وفوق شعبنا
الموت يلاحقك يا فريد
أصل قولك كان سديد
سعد قام وقالها كلمة
شعبك يا مصر كان عنيد
في انتظار الملحمة
جمال وجت له مضلمة
وشطي داق طعم الهنا
بإرادة باينة معلمة
قبل ما يطول الزمان
الفرح سابك يا مكان
خمسة يونية والألم
مد الأدين هد الكيان
ملاحة يومها اتوقفت
والقناة استسلمت
و الهزيمة علمت
في النفوس أكبر علام
تغرق قلوبنا في الآلام
الحلم لسه ما اكتمل
أمتي نرفع الهمم
وسينا يحضنها العلم
تحية للجندي البطل
شامخ وفيه كل الشيم
رمز الآمان رمز الأمل
بدمه سطر القيم
٧٥ كان الكلام
مرت سفنا بالتمام
لما طهرها السادات
وعاد لمصرنا الثبات
عزيمة فاتت في الحديد
صحت في مصر جيل جديد
ولادة يا مصر الوليد
زنده فايت في الحديد
من الفرافرة الفيوم
في الوحات الخير يدوم
مصر راية الأصول
شعب عاشق الوصول
مد أيدك يا ولد
خيرها غرف البلد
مصر عايشة بحسكم
أمتي تكون ليها السند
تأليف الأديب الشاعر والسيناريست خالد الجمال
من ديوان خارج الزمن
