“معلومة فنية على الماشي “
النبيلة – مرات الضيف أحمد
صفاء مصطفي .. الجمهورية المصرية
هل تعلم أن دي الصورة الوحيدة المتاحة لزوجة الضيفة أحمد .. السيدة الفاضلة نبيلة مندور .. واللي تجوزها الضيف أحمد قبل وفاته بـ 3 سنين .. واللي اضطرت تتصل ببوليس النجدة علشان ينقذ جوزها لانها اتصلت الإسعاف اكتر من مرة ومحدش جه.
في يوم وفاة الضيف كان راجع من الاردن بعد عرض خاص لفيلمهم هناك، وكأن بياكد على سمير وجورج على بروفات مسرحية “الراجل اللي جوز مراته”، يا دوب وصل البيت، قال لمراته “نبيلة مندور (الضيف اتجوز مرة واحدة وخلف بنت اسمها رشا)، قال لمراته انه تعبان وحاسس نفسه ضيق، وراح مريح ع السرير، مراته طلبت دكتور، الدكتور مجاش، طلبت اسعاف مجاتش خبطت ع الجيران، وقالتلهم الضيف تعبان قوي، في النهاية راحوا لمستشفى العجوزة.. وفي الطريق للمستشفى مات.
علاقة الضيف أحمد بنبيلة مندور بدأت بالصدفة، فقالت نبيلة في حوار يتيم في مجلة الإذاعة والتلفزيون انها كانت بتزور صديقة عاملة عملية، وهناك قابلت الضيف أحمد اللي يبدو انه كان صديق مشترك بين الاتنين، نبيلة كانت بتشتغل في شركة عقارات، الضيف سأل نبيلة لو تعرف واحدة بتكتب على الالة الكاتبة عشان تكتبله السيناريوهات فقالتله اه.. بس بشرط تديها اجر كويس ومتبخلش عليها. قالها عنيا..
وراح الضيف للشركة العقارية اللي فيها نبيلة مندور، وقابل البنت اللي بتكتب على الالة الكاتبة، الغريب ان الضيف قال للبنت انتي تكتبي الورق وتديه لنبيلة وانا هاخده من نبيلة، وراح الشركة مرتين يستلم ورق، وفي المرتين طبعا قابل نبيلة، وفي مرة كلمها قالها انا مش قادر اجي اخد العمل ممكن تجيبهولي في التلفزيون وهيبقى جميل مش هنسهولك.. فراحت وقابلته في التلفزين.. بعدها أبو نبيلة مات، فهي خدت إجازة من الشغل، راح كالعادة يشوفها ملقهاش، فعرف انها في إجازة عشان وفاة والدها.. نبيلة راحت اسكندرية، فجاب الضيف رقم ابن عم نبيلة وطلب ايدها منه..
واتكتب الكتاب سنة 66.. واتجوزوا في 18 يونيو 1967.. وراحوا يقضوا شهر العسل في الإسماعيلية.. أثناء ما كان بيصور فيلم شاطئ المرح اللي هو بتاع شبربررم… وبعدها خلف بنته الوحيدة رشا سنة 1968.. ولما مات الضيف كانت رشا سنة و5 شهور..
الفنان أحمد نبيل قال إن الضيف مخرج المسرحية لما مات وقفت المسرحية، وانسحب الفنانون بحثًا عن فرص عمل جديدة، ولما عرف فؤاد المهندس بالقصة، اجتمع بصناع المسرحية، وقالهم انا هخرج المسرحية، بس ليا شرطين.. الأول اني ماخدش أي اجر.. والتاني.. ان المسرحية يفضل مخرجها الضيف احمد وميتحطش اسم غير اسمه عليها..
في حوار لنبيلة مندور، مع اخر ساعة، قالت إن الفنان عزت بدران هو من لم ينقطع عنها حتي الآن لأنها من قامت بتربيته منذ الصغر وأنه لم يفارقها في لحظة احتاجت له فيها، ولما سالها مين كان بيسال عليكي بعد وفاة الضيف، قالت كانت سعاد حسني رحمها الله من أكثر الناس ترددا علي منزلي بعد وفاة الضيف وتحية كاريوكا وأحمد حلاوة (مش عارف اذا كانت تقصد فايز حلاوة جوز تحية ولا الفنان الشاب احمد حلاوة وقتها)..
وكان السؤال اللي ضايقني، لما سالها ليه اختفيتوا عن الاعلام والدنيا بعد وفاة الضيف أحمد، فالست قالت: “لأنه لا يوجد أحد أو جهة اهتمت بذكري ميلاد أو وفاة الضيف ولا بحياتنا بعده”.. ودا سلو بلدنا زي ما انت عارف..
سعيت كتير اني اعمل حوار معاها.. يكون نواة لكتاب عن الضيف احمد لانه يستحق… بس للاسف مقدرتش اوصلها.. فلو حد يقدر يوصلني بيها اكون شاكر جدا… او حد يوصلها رغبتي
رحمه الله على الفنان الضيف احمد
