معلومة فنية على الماشي  شبرد كينج أصبح “عبدالله” خذلان فى حياة “سامية جمال “

معلومة فنية على الماشي 

شبرد كينج أصبح “عبدالله”

 خذلان فى حياة “سامية جمال “

صفاء مصطفى 

الفنانة سامية جمال حياتها كانت عبارة عن سلسلة متواصلة من الخذلان.. حرفيا رغم ابتسامتها الدائمة

“أنا مؤمن بأي إله تؤمنين فيه، فأنت لن تؤمني إلا بإله عظيم”.. دي كلمات قالها شبرد كينج اللي هيخش الاسلام ويبقى اسمه عبدالله ويتجوز سامية جمال

 طيب الحكاية بدأت إزاي 

 سامية كانت بتحب فريد الاطرش.. وفريد بيحبها.. حلو .. فريد قال لاهله عايز اتجوزها.. اهله كانوا امراء في سوريا عيلة الاطرش.. قالوله ازاي انت تتجوز رقاصة ورفضوا رفضا قاطع.. فريد كان جبان أو طيب ومعرفش يواجه 

 فيه ناس بتقول أن هو رفضها مش صحيح .. الغريب أن اخوه فؤاد اتجوز من الممثلة إيمان عادي. وبعدها من هدى سلطان عادي. 

سامية ساعتها جالها عرض تمثل في فيلم فرنسي اسمه علي بابا بطولة فرناندل (كان اسماعيل ياسين قلده في كذا فيلم).. المهم يا سيدي .. سامية كنت مجروحة وكارهة مصر فحبت تخرج.. عملت الفيلم وهناك اتعرفت على متعهد حفلات اسمه شيبرد كينج… شيبرد قالها انا بحبك وعايزة اتجوزك.. قالتله مينفعش انا مسلمة ومينفعش اتجوز غير مسلم…

 شيبرد ساعتها قالها “أنا مؤمن بأي إله تؤمنين فيه، فأنت لن تؤمني إلا بإله عظيم”

 جه مصر وغير دينه في مشيخة الازهر وسمي نفسه عبدالله وهتلاقيه في الصورة بيكتب كتابه عليها على أيد شيخ .. سامية في الفترة دي كانت مجروحة وعندها ازمة ثقة ومحتاجة اي حد يقولها كلام حلو ويحسسها انها حلوة وانها مش منبوذة.. زي اي حد عنده ازمة ثقة..

 وفعلا اتجوزوا سنة 1951.. قالها بقولك ايه .. يلا نقضي شهر العسل في ولاية تكساس في امريكا.. قالتله يلا.. هناك بعد شهر العسل عملت كام شو على المسارح..عجبوا الناس برا قوي قوي .. وبقيت مطلوبة جدا.. عبدالله او شيبرد بشغله كمتعهد حفلات خلاها الراقصة رقم 1 في تكساس كلها وفي امريكا.. وفي خلال سنتين كاملين كانت حفلات سامية جمال كومبليت كلها…. كانت اغلي اجر واكتر فلوس..وحتى ليها حوار انها هي اللي دخلت اكلة البامية لامريكا.. لانهم عملوا حوار معاها في الجرايد وسالوها اكلتها المفضلة فقالت البامية.. فجات الاف الرسائل تطلب تعرف ايه هي البامية.. فراحت عملت حوار بالصور على طريقة عمل البامية.. وانتشرت في تكساس.. 

المهم سامية، نجحت وعملت رقم خرافي وقتها في الخمسينات… شغل على مدار الساعة تقريبا كل يوم حفلة وكل اسبوع في ولاية … لفت لفة حلوة.. كل الفلوس اللي اتعملت خدها منها جوزها وضربها وطلقها..

وبعد سنتين الراجل اللي شايف انه بيؤمن بأي أله تؤمن بيه طلقها ورجعها مصر من غير فلوس ولا جوز.. ساعتها رجعت كانت مكسورة فاتجوزت رشدي أباظة … ايه دا هي اللي ترجع وهي مكسورة تتجوز رشدي اباظة.. ما هو كمان ساعتها كان مكسور.. 

  سامية جمال كانت حياتها عبارة عن سلسلة من المقالب والخذلان من وهي 5 سنين والعذاب اللي شافته بس مستحيل تلاقي صورة ليها مش بتضحك.. 

رحم الله الفنانة القديرة سامية جمال