“شخصيات وحقائق “
ابطال فيلم عائلة زيزي ..؟
صفاء مصطفى
فيلم عائلة زيزي الفيلم الوحيد اللى كل العناصر النسائية فيه حصلهم مشاكل كتير في حياتهم.. ودي صدفة ليس إلا.. وخلينا نمشي
ونبدأ بالام عقيلة راتب
عقيلة راتب اول واحدة في مصر تتلقب بالسندريلا .. قبل سعاد حسني وليلى مراد .. وكانت وهي صغيرة جميلة جدا .. فكانت بطلة لكتير من الافلام .. لكن للاسف الافلام دي اتحرقت ..
عقيلة اتجوزت من المطرب حامد مرسي .. واللي 90% من الناس ميعرفهوش .. حامد مرسي كان لقبه بلبل مصر الوحيد .. عارف شهرة حليم هو كان قدها عشرين مرة .. وكانت الستات بتعشقه .. وهو اتجوز عقيلة .. وخلف منها بنتهم الوحيدة أميمة.
عقيلة عملت مسلسل مهم قوي في بدايات التلفزيون اسمه عادات وتقاليد .. وصل لـ 400 حلقة .. وكانت عاملة شخصية مهمة قوي .. اسمها شخصية حفيظة هانم .. ويمكن ناس كتير ميعرفش ان صوتها كان حلو وكانت بتغني..
عقيلة كانت بتصور فيلم اسمه المنحوس عام 1987.. وهي بتصوره فقدت بصرها .. وكان فاضل كذا مشهد .. فصممت تصورهم .. وهي كدا .. ومحدش خد باله انها فقدت بصرها .. وبعدها اعتزلت الفن وقعدت في بيتها مع بنتها .. لحد ما ماتت 22 فبراير 1999…
الاخت الأوسط .. سعاد حسني..
اكيد كلنا عارفين حياتها انتهت ازاي وعارفين نهايتها الحزينة في لندن واللي لغاية دلوقتي لغز كبير.
– ليلى شعير..
ليلى كانت عاملة دور جارتهم اللي بيحبها أحمد رمزي .. والفيلم دا كان اول فيلم ليها.. اتجوزت من الفنان عمرو الترجمان .. عمرو كان ممثل ضعيف بس كان وسيم فدخل الفن من باب الوسامة.. وبيحكي أحمد رمزي عنه: “كنا بنتقابل في نادي الجزيرة، وفي مرة من المرات وقف عمرو الترجمان وقال نكتة عن عبدالناصر، وضحكنا كلنا عليها والموضوع عدى. بس بعدها علطول فوجئت إن والد عمرو بيقول إنه مارجعش البيت بقاله 3 أيام ومش عارفين عنه حاجة. ولما رجع لقيناه مابيتكلمش ومبلم، اتضح أن النكتة دي كانت سبب في اعتقاله وبعدها سافر ومرجعش”.. وهي كمان سافرت برا فترة وبعدين رجعت بس كانت كبرت خالص..
– إكرام عزو – زيزي
إكرام كبرت واشتغلت مدرسة وسابت الفن واتجوزت طبيب الأطفال سمير الصاوي، وخلفت منه 3 أبناء هما أحمد وإبراهيم ونورهان… وكان عندها ازمة في القلب .. وشخصوا حالتها بزيادة كهرباء القلب .. وعملولها عملية جراحية فيها .. ونصحوها الاطباء بالراحة التامة.. لكن هي صممت تروح تحج.. وفعلا راحت السعودية حجت .. لكن لما رجعت كان المرض تمكن منها.. فماتت سنة 2001.. في 13 يونيو ودفنوها في مقابر العائلة.
– سلوى سعيد.
خطيبة سبعاوي، البنت اللي كانت بتشر رقة.. اللي قالها انتي احلى مكنة شفتها في حياتي .. مين دي .. وراحت فين .. بحث ودورت ولقيت الاجابة انها اتجوزت فنان شهير وبقت نجمة كبيرة..سلوى سعيد فنانة سورية من أصول كردية، ورغم نجاحها وانتشارها في مصر وإجادتها اللهجة المصرية، لكن سلوى سعيد رجعت سوريا مرة تانية واستقرت فيها، وشاركت في عدة مسلسلات تليفزيونية وأفلام سينمائية في سوريا ولبنان والأردن.. واتجوزت من الفنان السوري الشهير طلحت حمدي.
واشتهرت سلوى سعيد بالأدوار الجرئية بعد سفرها إلى سوريا، فهي التي شاركت في فيلم “المغامرة” مع الفنانة نهاد علاء الدين (إغراء) والفنان هاني الروماني، وهو فيلم جرئ تم منعه من العرض، وفيلم “الحب الحرام 1976” الذي هاجموه النقاد لجرأة المشاهد التي أحتواها.
وفضلت سلوى سعيد عايشة في وطنها الأصلي سوريا، حتى توفيت في يوم 9 يوليو سنة 2000 عن عمر يناهز 65 عام..
رحم الله جميعا
