معلومة فنية على الماشي
“عدلي كاسب” ممثل من العيار التقيل
صفاء مصطفى
فنان يقدر يقنعك باي دور مهما كانت طبيعته.. حقيقي بشوفه ملبوس..الفنان عدلي كاسب
يعني مثلا رئيس التحرير بتاع بللم في طاقية الاخفاء… وهو الجزار اللي بصاته مرعبة في السفيرة عزيزة … وهو الخال الفاني في العريس يصل غدا.. وهو ابو لهب.. بمناسبة ابو لهب
عدلي كاسب كان راجل جدع بيحب بيته قوي.. وكانوا صحابه عبدالمنعم إبراهيم، وشكري سرحان، وسعيد أبو بكر، وإبراهيم سعفان، وكان بيحب الأستاذ حسن فايق قوي .. كان بيحبه حب الأستاذ، ولما أصيب حسن فايق بالشلل النصفي في نهاية حياته، كان عدلي كاسب الفنان الوحيد اللي بيزوره باستمرار في بيته.. ويميل عليه ويقوله عايز حاجة يا عم حسن.. وياخد القعدة معاه ويمشي… اصل الشدة هي اللي بتبين المعادن فيه اصحاب زفة كدابة.. لكن اللي يفضل يود ويسأل دا ابن اصول وصاحب بجد.
عدلي كاسب كان ليه روتين انه كل جمعة مهما كانت مشاغله، انه يروح يصلي الجمعة في مسجد سيدي الأنصاري في منطقة مصر القديمة، وبعدين يقابل أهل المنطقة ويسلم على الناس وكان كل خميس لازم يروح يصلي في مسجد الحسين.
الناس في الشارع كانوا ينادوه باسماء شخصياته بس كان بيزعل لما حد يقوله ابو لهب
المهم ربنا كرمه واتشهر و طلع معاش من وزارة التربية والتعليم، وانتقل لفيلّا 14 غرفة في منطقة (حدائق القبة) في القاهرة وفيها 7 خدم.. وعربية حلوة.. وفي يوم كان في العربية مع ابنه كاسب.. ولقوا مهرج من اللي بيلفوا في الشوارع.. فدا راح راكن العربية ووقف يتفرج فابنه بيقوله ليه احنا مش فاضيين.. فقاله: ” يا بني ..دا فنان .. يعني زميل ليا بيعرض فنه لازم أشجعه”..
المهم اتفق معاه ابراهيم الشقنقيري، على عمل بطولة حسن يوسف، وهو بيعمل بروفات حس بنغزة في قلبه روح البيت، هو كان خايف قوي من موضوع القلب دا، عشان كان ليه 3 أخوات (طه واحسان وعطية). كلهم جاتلهم السكتة دي وماتوا بيها.. وهو كمان مات بيها..
فهو كان نفسه يموت وهو مبتسم وهو بيسمع الشيخ عبد الباسط عبد الصمد… فكان قبل ما ينام يعمل الابتسامة ع وشه وينام ويشغل اذاعة القران.. وفي يوم الأجل شغل عبدالباسط عبدالصمد اللي كان لازم ينام وهو بيسمعه.. وابتسم الابتسامة اللي مات عليها… وجم يصحوه لقوه ميت وهو مبتسم وصوت عبد الباسط عبد الصمد جنبه..
وكان دايما يقول يا رب انا مبسيبش فرض.. ليه الناس تعرفني بابو لهب.. كان راجل مصلي ومواظب على الصلاة في ميعادها في الجامع، مش عايز الناس تربط بيني وبين ابو لهب…
عدلي كاسب مكنش ليه اي خناقة مع اي فنان وكان حريص أن اي فنان يقع يوده ويسأل عنه ويساعده باللي فيه النصيب.
عدلي كاسب خلف اربعة ممدوح خريج تجارة، و(كاسب) خريج كلية الفنون الجميلة، (أمينة) خريجة الفنون جميلة، و(إيهاب) خريج كلية الاعلام… ممدوح كان غاوي فن.. ممدوح.. مات الله يرحمه سنة 2014
الله يرحم عدلي كاسب وممدوح ويصبر اللي عايشين…. ممثل من العيار تقيل قوي.. اللي تقدر تحمل عليه وهيفاجئك بحاجات مكنتش تتوقع انها عنده.. كان موهوب بزيادة
رحم الله الفنان القدير عدلي كاسب
