فى ذكري ميلاد الفنان “يونس شلبي”
صفاء مصطفي…الجمهورية المصرية
تحل اليوم السبت 31 مايو، ذكرى ميلاد الفنان يونس شلبي الذي ولد في مثل هذا اليوم بمدينة المنصورة بمحافظة الدقهلية عام 1941، وتوفي في 12 نوفمبر عام 2007، عن عمر ناهز الـ 66 عاما
حصل يونس شلبي، على درجة البكالوريوس من قسم التمثيل بالمعهد العالي للفنون المسرحية في عام 1969، ولطالما رسم الضحكة على وجوهنا.
تمر ذكري ميلاد الفنان يونس شلبي.. واللي رغم انه كان فنان وميسور ماديا، بس اتجوز متأخر، كان 45 سنة.. ودا لانه كان مرتبط جدا بأمه.. وكان عايز يتجوز ست تعرف تستوعب فكرة ان امه هتعيش معاه عشان مراته تخلي بالها منها.. ولقى دا في مراته.. وفعلا امه فضلت عايشة معاهم.. ولو شئما الدقة.. هو اشترالها شقة قصاد شقته عشان تبقالها خصوصيتها.. ويخدمها هو ومراته وولاده..
كان مبدأ يونس شلبي، رحمة الله عليه، إن كل اللي تطلبه امه مجاب، وميتنفعش يخرج غير لما يعدى عليها وهو خارج وهو راجع، واللي يزعلها كانه زعله هو.
عشان العلاقة دي، طبيعي تكون وفاة امه اكبر صدمة في حياته، واكبر لحظة دق الحزن فيها، حتى ان ابن الفنان يونس شلبي، بيقول في تصريحات صحفية، ان ابوه قال:”شرايين جسمى كلها ماتت بعد موت أمي”، ويمكن تشوف دا بلاغة منه يعني.. لكن دا كان حقيقي فعلا.. لانه اصيب بجلطات كتير بعد وفاة امه.. جلطات في رجليه وفي القلب والمخ..
في اليوم دا كان بيعرض مسرحية في اسكندرية مع مظهر ابو النجا، والمسرح كومبليت، دفن امه وراح العرض بالليل.. وبعد العرض أعلن مظهر أبو النجا للجمهور وفاة ام يونس شلبي، فبكى يونس شلي على المسرح.. وشاركه الجمهور البكا والحزن..
الموقف دا كان فارق في حياة يونس شلبي، لانه بعدها تقريبا بدأ دوامة المرض اللي فضلت ملازماه طول حياته لحد وفاته، ولحد ما ظهر وهو بيبكي من المرض في لقاء تلفزيوني شهير… بعد ما اصيب بجلطة وشلل نصفي.
بيحكي الابن، عن التغير اللي حصل في شخصية ابوه بعد وفاة امه، واللي خلاه شخص تاني غير اللي يعرفوه، يعني بقى عصبي، مبيتكلمش كتير، وبيبقى يبكى كتير، مع إن دموعه كانت عزيزة، لدرجة ان ابنه بيقول انا اول مرة اشوفه بيبكي كان ساعة وفاة والدته..
وتمر الايام، لحد يوم جمعة سنة 2007، نزل يصلي الجمعة، ورجع البيت، وقعد ع السرير يتكلم مع مراته، وفي وسط الكلام اغمى عليه..
جريوا بيه ع المستشفى، فعرفوا انه اصيب بجلطة في المخ، ودخل في غيبوبة 15 يوم، واتوقف قلبه مرتين.. لكن قبل وفاته بيوم فتح عينيه.. وبص للي حواليه.. بص بصة طويلة، ولف بنظره عليهم كلهم، ومتكلمش..
ويوم 12 نوفمبر عام 2007 مات يونس شلبي.. بعد ما ظهر فيي التلفزيون في لقاء بكى كل اللي بيشوفه وهو بيبكي بعد ما تقريبا اهله باعوا كل حاجة علشان يعالجوه..
رحمه الله على الفنان القدير يونس شلبي
